وجهة نظر

يد الله

01 يناير 2022 - 14:07

هاد ليد الشيّارة لذاك البعيد

الماسك لغمام بخيوط ساردة

وتقاطر من كمامو شلا شباح

فصفة عديانني

فصفة النوم لعداني…..

وفلشهر فوجهي نيابوومشى خلاني….

لنسّاني فالحلم

وكتابي مفتوح للبحر

وراقوا تشالي

ومعنتر على قواربْ رشّاها الملح وصّداها

ومسلطنْ على شجار الغابة الكاتمة

سرو فكتانةمن لوبر

راها ادي انا….. اسمع امولانا

من قلب الدار مقناعة

اديك انت وقوة الجماعة

يد رشمت حرف على حرف

هو باش ا قسمت وحلفت

وكان بوراق أحلامي حتّى وصلت

لقلوبكم

كان قنديل ظلامي

وكافيني نسلّك حيلتي للخرجة

كافيني نتخطى ىهبالي بدرجة

نقرا ونتههجى

ونفتل فتية مع فتية

حتى تصير مدجّة

فصدر لتشهى الموت بقجة

ومارضى يعيش مدلول

كان عكاز طريقي

باش

نجيكم

نتهامى فضيق الحال

بعين معصوبة

وعين تتقرا التاويل وتقارع التوبة ….

انتما قولوا مجدوب

قصدوا ينقي لرض من لعيوب

اوانا نقول لبغيت

كلشي على طرف لساني

ولحساب فدار دكَّن…

نجوع ولنسمن

كل وعباروا فيديه

لصفا يشرب

ولغنا يطرب

والى جاكم المغنان طالب السماحة

زوروه سيدي بوعراقية وتربعيت البصراوية

زوروه عيشة لكناوية

و شيخ الضيافة مول الشريط والملحة الحية

يعرف الرجل من لبنية

ايد ساعفت ظرف على ظرف

بيه تغنيت ملي تعنفت

وكان مكبّة جحجاحة على الهمّة لتلّفت

كان الصّد النّاري لخفاني على وحوش الغابة

كان الدرع الواقي

لمكاحل

الغشمة

الصخرة التابثة

ملي تهشمت ظهور البكمة

الشجرة الثامرة

ملي قلت النعمة

ولخريف طال سنين

كان حرفي وكان ظرفي وكانت يدي أنا

ماهي مجدامة

ماهي قاطعة رجاها من مصافحة المولى

ولا خايفة منكم الكوالة

ماهي معدامة

وكتسنى التّياض بفلس مغشوش

وتحكم الكمشة بذلالة

ما هي مكبالة

بعقال حدادي ومفتاحها مجلي في عيب الحيط

ومّلطاه غجمِيّة معلالة

فحواض الشوك

ماهي مشلالة

عاجزة على حمل السيف

فحركة شديدها يضرب ويطيح

يصمت

ويصيح

دم الشهيد كيصير واد جاري بماه

كيصير كرمة مجاورة كرمة

كيصير دمعة فعين لعمى

كان حرفي وكان ظرفي وكانت يدي أنا

طرف منّي ملي نغضب طرف ملي نتغنى

ملي نهادن ناري

ملي نعرس فالجنة

ماشي لرّش تحدد مبغاها

ولا لكبال وتاها

ماشي لمشانقة وقطيع لحبال

ماشي مجادف عطبانة فغرق لبحر

ماشي جناح فعلاه تكسر

ماشي منشار حافي يقطع بلا صبر

.. هاذي راه ادي… ادي انا

كان ظلها ماء

وكان الماء مراية

ما شربوه طيور

ماداز مرقرق معبور

كان ظلها هوا

وثناثر ترابُ فضاية لبكا

وبكينا

ملي هجّرها الّطير

وتغربت فطرافها لمعاني

وتعرينا

وسال دمها على دواحة لقراتو نساتوا

ورشماتو خطوط وكادية وتكوات

وتكوينا

عظمت مساها بشربة من خل النخلة

باش تنشر لخديعة بين عراش الكرمة

ويموت نقار الصخرةبالفضيحة

ملست بيه النوالة

علقت حجاب التفاهة

فعنق

الصيف

رددات مع صدى الجبال كلام المغيارة

ودست فشونها تيلاد الغدر

دفنت صفايح الرّيح تحت دفوف العمر

ورجعات عرجاء,,, نكدانة,,,, هيمانة,,,

وتقول انا

راشمة بعواد الدفلى حروف

كان السّراب يدفي بيهم قبور الموتى

وكانت السواقي ملِّي تجيح

تصنع منهم فلايك تقربهم لضفة النجا

ملي كانت لوناسة

والكاس

شروط كل خرجة

وكانت لخليلة

تبات ليلة

تطوي فركادو بلقياس

وتقول مكاين باس

الحبيب بغاه الخاطر

و كان بُوعكاز ينقر عين مُوكا

وخادم الجنانْ مْقَّلز فوق غصان الشُوكا

وشَرَقْراقْ يصوت فرماد الدار

الى جات المنزلة بشكاوي لبن

كل بحلابو

الى جات بشواري ذبان

فين ما غرّزتي الشُُوكة يسيل الدم

ولخْطية وعْلمَن نزلت

يكتَّف السبع بزغب النِّيف

وليكسي الثعلب بجلايل ضرَّة مالكة ثعبان

ولسارت لملامة

صبر

اشْ جا كْ

من تخراج العين؟

هاد ليد الشيّارة لذاك البعيد

يمكن صورة تالفة

يمكن خيال امراة حالفة

ميصلة من ذات هايجة

يمكن حزمة صوف

هازة عين مكفوف

وهربانة

يمكن هاذ البعيد حكاية

على ظهر الباطل

وصفاتوا اغرب من حالي

أغرب من حلالي

اغرب من حر السمايم

وقر الليالي

يمكن حلمة غْطاها سماها

وفكف عفريت صارت غمة

وزغبي ليام خداها

جمرة

يمكن خرارج تخوف وساكنة لقبورة

يمكن خرافةحاملة رحيل الفقية

للربع الخالي

قبل وصول لعجاجة ويتبعثر وراقوا

وتزمم بظفاروا جداول المنع

والتهميش

.. هاذي راه ادي… ادي انا…. اديك انت…. ايد مولانا

إشترك في نشرتنا البريدية وتوصل بمواضيع مثيرة للإهتمام

شارك المقال مع أصدقائك

شارك برأيك

اترك تعليقاً

لن يتم نشر عنوان بريدك الإلكتروني.

مقالات ذات صلة

وجهة نظر

حول زيارة المبعوث الشخصي للأمين العام للأمم المتحدة إلى الصحراء المغربية للمغرب

وجهة نظر

عبد الله إبراهيم.. هل لا زال ينتظرنا منذ 11 يناير 1944 ؟

أحمد بلمختار منيرة وجهة نظر

التنمية البشرية: تحديات كبرى تنتظرنا

تابعنا على