التيكيتة “L’étiquette”

مْلِّلي كتنجح فشي دور داخل الأسرة ديالك.. كيلصقو ليك التِّيكيتَة ديالو.. وكَيْعُود مَحْكوم عليك تلعب هاداك الدّور بلاما تْبْدّلو ولا ترتجل.. حيت يقدرو ميقبلوكش في الدور الجديد.. ميبغيوكش.

وعام ورا عام.. ومع البرمجة.. كتعود انت والدور ديالك واحد..

هو تيكيتْتَكْ.. وعنوان كتابك.. مفروض عليك تلعبو في الأسرة وفي المجتمع.

بحالاش؟!!!

اجيو نشوفو بعض الأمثلة:

” “الرّجولة ”  لي لبس هاد الدور كيكون ديما واقف مع دارهم ومع البرّاني..ميقدرش يقول لا ..أو يْرَجَّعْ شي حَدّ بلاما يقضي ليه الغراض ديالو ..خدوم بزاااف على حساب نفسو..

هو لي  يقدر يخلّي قرايتو باش يصرف على خوتو.. هو الشمعة.. القنطرة لي كيدوزو فوقها باش ينجحو.. كيضحي بزاااف.. شهيد وصافي!

ديما كيقدم لآخرين على راسو.. وغالبا كيتعرض للاستغلال.

” الحادكة” هي الأم الثانية لخوتها..كتخدم على كولشي ..ولي بغا شي حاجة في الدار كيسوّْلها..مخصهاش تعيا ولا تمرض ولا تتشكى..وغالبا مكتكملش قرايتها..  دايرة بحال حمار الطاحونة.. هاد المرا من بعد كتخدم ولادها وراجلها بنفس الطريقة…كتنعس هي لاخرا وتفيق هي لولا.. كدير كلشي في بلاصة ولادها …. لي في الغالب كيخرجو اعتماديين.. هادي هي ” العافية كتولد الرماد..

شاد طريق الله” هذا من أصعب الأدوار…ولا تدارت ليك التيكيتة ديالو …كتْحَطّ تحت المجهر… هذا هو شيخ الاسرة.. وضميرها.. الحلال والحرام.. معرفتش علاش كنتخيلو داير اللحية والتقصير.. هذا إلا تبحَّر شوية في العلوم وبغا يمشي في طريق الشك ويغير القناعات ديالو.. أو يعدل فيها …

وااااهلي !!!!

كتتسناه سياط ديال الجلد والرفض..  و” الفقيه لي كنتسناو باراكتو …

داخل سوق راسو” ..هذا هو المنسي داخل الأسرة.. لي مَكَيْدّي مكيجيب.. الدريويش.. لي ممسموحش ليه يحل فمو.. ويلا عارض أو تمرد أو بغا يفرض الوجود ديالو ..غادي يسمع: ” حتى انت تحَلّْ ليك الفم ..!” .. فكيْسدّ فمّو غالبا لأن المعركة ديالو خاسرة.. وكيرجع للركنة.. منْسِيًّا بلا طلبات!
هاد النوع يقدر وهو مليوح للتُّوش.. يتحول لمبدع.. وفي العلاقات مكيتيقش أنه يقدر يتحب أو يهتم بيه شي واحد.

لمْفْلّسْ”.. هاد لصكع هو لي كتعلق عليه الأسرة اي فشل واي مصيبة… مّو مخاصمة مع بّاه، هو السبب.. مّو مريضة هو لي مرضها وفاقسها.. بعد المرات حتى هوما كيبغيوه بلاما يشعرو، يبقى فهاداك الدور  ومايتصلحش.. باش لي دار شي مصيبة يلقاه موجود باش يعلقها عليه.
هذا ماكيكونش متيق أنو يقدر ينجح…. تبرمج على أنو مصيبة كتمشي فوق الارض… الا شي نهار قرر يبدل الدور ديالو يقدر يتصاحب مع النجاح..

ستيلو حمر ” ..ما عاجباه حتى حاجة ..لا في الدار ..لا فلبلاد..لا فعيشتو..لا فحياتو..كاره كلشي..وماعندو الدراع باش يغير حتى حاجة.. هاز ستيلو حمر وكالس يصحح.. ويلعن في الظروف لي حطات بحالو وسط هاد الناس
هذا هو ” ماكااااينش معامن ” بطريقة كبور..

المجتهيد “.. هدا هو لي كيكون ديما يجي الاول.. وكتغرس فيه الأسرة عقدة التفوق من كثرة المديح والتصفيق.. كيبقا مسكين يتحرق عمرو كامل باش يزيد ينجح ويحقق انجازات…عائلتو ديما كيتباهاو بيه.. هو البطل ديالهم.. هادشي علاش كيعيش خايف من الفشل.. وكيبغي ديما الاضواء تبقى محطوطة عليه.. حياتو عامرة ستريس..

الضّحّوكي” هو كبور ديال الدار.. هو لي عندو الحس الفكاهي وكَيْقَلّب على النكتة في عز الضيق والازمات.. ديما ضاحك ومضحك مالين دارهم وممسموحش ليه يهجرو شي نهار… ممسموحش ليه يمرض.. يبكي.. يكتئب.. مشكلنو مللي كيخرج للمجتمع أنو كيستمر فنفس الدور باش يلقى التقدير .. شي لي ماشي ممكن.. حيت يقدرو الناس لاخرين يجيهم ضحكو باااسل.. ويهجروها ليه.

هادو بعض النماذج ديال التيكيتات لي كتلصقها علينا الاسرة وكنخرجو بيها للمجتمع.. وهي لي كتشكل الدور لي كنلعبوه في الحياة..
الأسرة الناجحة هي لي كنتبادلو فيها الأدوار.. كيكون عندنا الحق نرتاجلو في الدور.. أو نغيروه.. كيكون عندنا الحق نلعبو بزاف الأدوار… ماكاينش فيها دور بطولة ولا دور ثانوي..

حنا ضعف وقوة ..نجاح وفشل .. ايمان وشك.. حداكة وعكز.. حب وكراهية.. وديما محتاجين للحب والقبول حتى وحنا كنبدلو الدور ديالنا..

الا كنتي من صحاب التيكيتة.. حيدها عليك..واجي نرتاجلو..